Në datat 26-28 prill 2023, në Muzeun Kombëtar të Hungarisë në Budapest, u zhvillua konferenca ndërkombëtare me titull “First Kings of Europe: LEADERSHIP AND INEQUALITY IN PREHISTORIC SOUTHEAST EUROPE” (Mbretërit e parë të Evropës: Udhëheqje dhe pabarazi në Evropën Juglindore Prehistorike). Konferenca u organizua nga Instituti Kombëtar i Arkeologjisë – Muzeu Historik Kombëtar i Hungarisë, si një ngjarje anësore e ekspozitës First Kings of Europe në Amerikën e Veriut (2022-2025). Ligjërata të shumta shkencore, nga kërkues dhe institucione të ndryshme botërore, trajtuan shfaqjen e formave të ndryshme të pabarazisë sociale në Evropën Juglindore gjatë prehistorisë së vonë. Midis personaliteteve të ndryshëm pjesëmarrës dhe folës kryesor ishin edhe Prof. Eszter Bánffy (Instituti Gjerman i Arkeologjisë), presidente e Europian Association of Archaeology dhe Prof. Kristian Kristiansen (Universiteti i Gotenburg, Global Institute, Copenhagen).
![](http://asa.edu.al/site/ia/wp-content/uploads/sites/6/2023/05/1-300x300.jpg)
Dr. Rovena Kurti (Departamenti i Prehistorisë, Instituti i Arkeologjisë/ASA), ishte pjesëmarrëse në panelin e diskutimit rreth seancës me temë “Elitat dhe luftëtarët e periudhave të metaleve” (Bronzit dhe Hekurit) ku u diskutuan çështje të ndryshme si: Si i identifikojmë elitat ushtarake? Çfarë gjurmësh arkeologjike ata kanë lënë pas në zona të ndryshme të Evropës JL? Si ndryshon përqendrimi dhe strukturimi i pushtetit nga periudha e Bronzit në atë të Hekurit? Është një ndryshim gradual apo një thyerje?, etj.
![](http://asa.edu.al/site/ia/wp-content/uploads/sites/6/2023/05/2-300x225.jpg)
Një sërë aktivitetesh të tjera shkencore priten të zhvillohen në të ardhmen në kuadër të ekspozitës “First Kings of Europe”.
![](http://asa.edu.al/site/ia/wp-content/uploads/sites/6/2023/05/3-300x300.jpg)