U hap mbrëmë në Field Museum of Natural History në Çikago ekspozita “FIRST KINGS OF EUROPE”. Është një rast i rrallë bërja bashkë e një ansambli me rreth 700 objekte – ndër të tjera bizhuteri dhe armë – që nuk janë shfaqur kurrë më parë së bashku. Organizatorët e kanë menduar si një udhëtim për të zbuluar mjetet parahistorike, armët dhe objektet e ritualeve të përdorura në Ballkanin e 5000 vjetëve më parë, shpata, sëpata, kurora të çmuara që i kthyen luftëtarët në mbretër dhe ndryshuan përgjithmonë strukturën e shoqërisë. Vizitorët do të gjejnë aty objektet më të vjetra prej ari të bëra nga njeriu, të njohura si thesari i Varnës, të krijuara mbi 6000 vjet më parë; kryevepra të armaturës nga epoka e bronzit; kurora e artë vezulluese e një princi thrakas; një kurorë me gjethe ari dhe figurën e Nikesë, perëndeshës së fitores. Organizatorët kanë realizuar video, audio dhe pamje multimediale të krijuara për ta zhytur vizitorin në ritualet ceremoniale të atyre kohëve.
![](http://asa.edu.al/site/ia/wp-content/uploads/sites/6/2023/04/338170731_591974079525527_3990072204968203070_n-225x300.jpg)
26 muze dhe 11 vende në të gjithë Evropën Juglindore kanë kontribuar për këtë ekspozitë midis tyre Kosova dhe Shqipëria me objektet e saj të trashëgimisë prehistorike, pjesë e fondeve të rralla të Institutit të Arkeologjisë – Akademia e Studimeve Albanologjike. Në ceremoninë e mbrëmshme zyrtare morën pjesë disa nga arkeologët që kanë punuar rreth 3 vjet për këtë përfaqësim të Shqipërisë Rovena Kurti, Rudenc Ruka dhe Belisa Muka.
![](http://asa.edu.al/site/ia/wp-content/uploads/sites/6/2023/04/339095728_173677928844878_1533929443901963319_n-225x300.jpg)
Hapja për publikun e gjerë fillon sonte.