Drejtues dhe studiues të Akademisë së Studimeve Albanologjike morën pjesë në konferencën shkencore: “Kosova 10 vjet shtet – Mësimet dhe pritjet”, të organizuar nga Universiteti i Prishtinës “Hasan Prishtina”. Një konferencë, e cila shënoi fillimin e festimeve zyrtare për 10 vjetorin e Pavarësisë së Kosovës, me pjesëmarrjen e studiuesve nga Tirana, Prishtina, Tetova, Korça, etj, si dhe të zyrtarëve të lartë politikë e qeveritarë, përfshirë zv/kryeministrin e qeverisë së Kosovës, z. Fatmir Limaj. Në emër të ASA-së, konferencën e përshëndeti Rektori i ASA-së, Akademik Marenglen Verli, i cili theksoi mesazhin e rëndësisë së studimeve akademike dhe të rolit të elitave në shtetformim dhe bilancin 10 vjeçar, si dhe iu bashkua apelit adresuar brezave të rinj që ta duan e ta respektojnë më shumë shtetin, kombin e simbolet e tyre.
Gjatë punimeve të konferencës referuan me punimet e tyre Akad. Prof. Dr. Marenglen Verli me temën: “Zgjidhja e çështjes së Kosovës dhe stabiliteti në rajonin e Ballkanit”,
Prof. Dr. Beqir Meta me temën: “Pavarësia e Kosovës si domethënie e ndryshimit të marrëdhënieve ndërkombëtare në Ballkan dhe e pozitës së shqiptarëve në këto raporte”,
si dhe Prof. Asoc. Afrim Krasniqi me temë: “Tipare të raporteve Shqipëri-Kosovë para dhe pas Pavarësisë”.
