Sezoni i kërkimeve arkeologjike të vitit 2022, si pjesë e projektit Dyrrachium në Antikitetin e vonë, kishte në focus vazhdimin e gërmimeve në sektorin 6/Forumi Rrethor, me synim plotësimin dhe saktësimin e të dhënave të deritanishme rreth fazave të ndryshme ndërtimore që lidhen me këtë monument. Projekti DAV i Institutit të Arkeologjisë/Akademia e Studimeve Albanologjike, drejtohet nga prof. assoc. dr. Brikena Shkodra me mbështetjen e studiuesve nga ky institucion, si edhe përfshirjen e profesionistëve të jashtëm arkitektë e studentë nga Departamenti i Arkeologjisë dhe Trashëgimisë Kulturore në Universitetin e Tiranës dhe Universitetin e Prishtinës.
Pozicionuar në dy prej strukturave përbërëse të monumentit, ambientin perimetral D (sondazhi 3) dhe kolonadën rrethore (sondazhi 4), gërmimi parashihte respektivisht zgjerimin e kërkimit në ambientin D për plotësimin e të dhënave rreth fazës ndërtimore që i paraprinin ndërtimit si edhe hapjen e një sondazhi të ri në pjesën e kolonadës për verifikimin e pranisë ose jo të së njëjtës fazë ndërtimi edhe në këtë pjesë të monumentit (Fig. 1).
Gjurmët e zbuluara strukturore të një kompleksi ndërtimor, i cili paraprin ndërtimin e Forumit Rrethor, janë dëshmi e një faze të rëndësishme rindërtimi të strukturave ekzistuese rezidenciale romake, gjatë shekulli IV-V, duke e bërë më kompleks nivelin e deritanishëm të njohurive mbi përshtatjet urbane të kësaj periudhe. Pjesë e këtij informacioni të ri ishte edhe zbulimi i gjurmëve të një aktiviteti artizanal, furrë për prodhimin e enëve prej qelqi, i lidhur me njërin nga funksionet e këtij kompleksi ndërtimor të periudhës romake të vonë (shekulli IV-V) (Fig. 2).
Sekuenca pasuese stratigrafike, e lidhur me projektin e ndërtimit të Forumit Rrethor, prodhoi të dhëna të reja për saktësimin e njohurive dhe plotësimin e dokumentacionit për fazat e lidhura me ndërtimin dhe transformimin e monumentit. Konfirmohet më tej se ky monument përfaqëson një fazë të rëndësishme transformimi të planit urban të qytetit të shekulli VI, tashmë orientuar nga verilindja, si edhe monumentalizimin e tij, nga një hapësirë me funksione domestiko/artizanale në qendrën publike të qytetit antik të vonë (Fig. 3).
