Rektori i Akademisë së Studimeve Albanologjike, prof. dr. Luan Përzhita, priti sot dy përfaqësues të Qendrës Kulturore të Ulqinit. Drejtoresha e Qendrës Adriana Hoxha dhe arkeologu pranë kësaj Qendre, Anton Lulgjuraj, i shtruan kërkesën rektorit të ASA-s për të ngritur ura bashkëpunimi në shërbim të kulturës dhe trashëgimisë së shqiptarëve në Ulqin. Qendra Kulturore e Ulqinit ka një bibliotekë dhe një muze të trashëgimisë kulturore, për fondet e të cilave ASA mund të kontribuojë si fillim me një donacion botimesh historike. Në vazhdimësi, është i mundshëm, përtej pengesave burokratike, të nisë një shkëmbim në fushën e muzeologjisë. Drejtoresha Hoxha shprehu nevojën për trajnimin e kuadrove në fushat e arkeologjisë dhe të etnografisë, restaurues dhe konservues të objekteve të trashëgimisë kulturore.

Rektori Përzhita shprehu vullnetin që ASA të kontribuojë aty ku Qendra e Kulturës në Ulqin të ketë nevojë për ekspertizën e kërkimit shkencor. “Frika dhe stepja duhen lënë mënjanë”, tha prof.dr. Përzhita. “Ulqini është vetëm 3 orë larg Tiranës. Si hap i parë, është e rëndësishme të krijojmë një klimë mirëkuptimi dhe bashkëpunimi dhe të vijojmë më tej me programe konkrete.”