Rektori i Akademisë së Studimeve Albanologjike Luan Përzhita priti sot përfaqësues të Shoqatës për Trashëgimi dhe Krijimtari Kulturore në Luginën e Preshevës, Bujanocit dhe Medvegjës

30 Mars, 2023 Njoftime
Rektori i Akademisë së Studimeve Albanologjike Luan Përzhita priti sot përfaqësues të Shoqatës për Trashëgimi dhe Krijimtari Kulturore në Luginën e Preshevës, Bujanocit dhe Medvegjës, Xhemaledin Salihu (kryetar) dhe Shpëtim Memishi (kryetar i kuvendit të shoqatës).
Qëllimi i kësaj vizite ishte përgatitja e një klime bashkëpunimi mes ASA-s dhe faktorëve të angazhuar në hulumtimin dhe ruajtjen e trashëgimisë kulturore në këtë territor trojesh etnike shqiptare nën juridiksion serb. Kjo shoqatë me aktivitet mbi 10-vjeçar ka marrë përsipër regjistrimin e objekteve kulturore dhe natyrore, edukimin e të rinjve përmes trashëgimisë kulturore, organizimin e konferencave mbarëkombëtare për personalitete të shkencës shqiptare. Rektori Përzhita e përshëndeti punën e deritanishme të shoqatës dhe shprehu vullnetin për fillimin e një bashkëpunimi në rrugë institucionale me komunën e Preshevës dhe me institucionet e arsimit për të krijuar projekte afatgjata ku të përfshihen studiues të arkeologjisë, historisë, gjuhësisë e antropologjisë në këtë zonë me kulturë të pasur por ende të pashkruar.
Përfaqësuesit e Shoqatës për Trashëgimi dhe Krijimtari Kulturore shprehën nevojën për ekspertë në fusha të albanologjisë për të evidentuar pasuritë kulturore si dëshmi të identitetit kombëtar të shqiptarëve në Luginën e Preshevës, Bujanocit dhe Medvegjës.
2024 © Institutet dhe qendrat e Albanologjisë. TË GJITHA TË DREJTAT TË REZERVUARA. POWERED BY WEBART.AL