Akademia e Studimeve Albanologjike e ka quajtur të rëndësishme që së pari, të ndajë në ceremoninë e çeljes një albanologji përtej nesh, gjithë arritjet e këtij viti, si vazhdim i viteve paraardhëse, në nivelin e bashkëpunimeve.

Në përshëndetjen e rastit, rektori Luan Përzhita tha se “për asnjë çast, nuk kemi ndalur punën për të prezantuar para botës akademike evropiane e më gjerë, arritjet më të mira të albanologjisë shqiptare. Po ashtu në respektim të orientimeve për ndërkombëtarizimin e kërkimit shkencor, Akademia e Studimeve Albanologjike është përpjekur dhe ka punuar shumë në këtë drejtim dhe kjo është reflektuar në një sërë bashkëpunimesh me universitete të huaja”. Pjesë e këtij partneriteti në fushën e arkeologjisë, gjuhësisë dhe të letërsisë, antropologjisë e historisë janë universitete e institucione shkencore evropiane e botërore si ai i Këlnit, Goethes, Humbold-it e Regensburgut në Gjermani; Montpelier-së, Lumiere Lyon 2, Aix en Provence-ës në Francë; Universiteti i Gjenevës në Zvicër; i Studimeve të Catanias, La Sapienzas, Romës, Bolonjës, Chiettit, L’Orientale i Napolit në Itali; Shkolla e Konservimit dhe Restaurimit e Ponteverde-Galicias në Spanjë, Shkolla Franceze e Athinës në Greqi ; “ST. Kliment Ohridski” i Sofjes në Bullgari, i Oxford dhe Liverpulit në Britaninë e Madhe; Universiteti i Buffalos në SHBA etj.

Në këtë linjë, drejtorët e instituteve të ASA-s përshkruan ngritjen e këtyre urave me homologët në botë nëpërmjet botimeve në gjuhë të huaj, lektoriumeve në katedra të rëndësishme, aktiviteteve të përbashkëta për çështje gjuhësore ku ASA është përfaqësuar nga studiuesit e Institutit të Gjuhësisë si dhe konferenca të organizuara nga Instituti i Historisë për marrëdhëniet diplomatike të shtetit shqiptar me Shtetet e Bashkuara të Amerikës, Britanisë së Madhe, Austrinë. Me rëndësi ka qenë këto vite bashkëpunimi me Fondacionin “Konrad-Adenauer”.

Në prani të zv/ministres së Arsimit dhe Sportit Albana Tole, rektori Përzhita theksoi se ky rol elitar dhe udhëheqës i ASA-s do duhet shfrytëzuar më mirë në sistemin arsimor. “Institucioni ynë duhet të jetë një organ i rëndësishëm konsultativ, përmes ekspertëve tanë për të gjitha tekstet mësimore që kanë lidhje me fushat tona të studimit, si dhe për një respektim të gjuhës standarde shqipe në të gjitha tekstet mësimore.”

Në vazhdim u prezatuan disa nga botimet më të rëndësishme të ASA-s për këtë vit: “Historia e shqiptarëve gjatë shek. XX”, vëllimi IV, grup autorësh; “Xhubleta” nga prof. Afërdita Onuzi, “Dardanët” nga prof. Luan Përzhita, “Vegla bakri dhe sëpata bronzi në Shqipëri dhe Kosovë” nga Adem Bunguri; “Studime për fjalën shqipe 5, 6” nga prof. Valter Memisha,

i cili bëri dhe një prezantim të botimeve të reja të ASA-s.

Në përmbyllje, në ceremoninë “Çmimi i Albanologjisë”, u nderuan albanologu Robert Elsie-n (pas vdekjes), gjuhëtari Agron Duro dhe arkeologu Skënder Aliu.